’n Onbreekbare verbond
deur Francine van Niekerk In die antieke tye was ’n verbond wat twee mense met mekaar gesluit het, nogal morsig. Die twee partye het ’n dier gekry, dit in twee gedeel, en in die vorm van ’n agt rondom die twee stukke vleis geloop. Daar is geen einde aan die vorm van ’n agt nie, en dus geen einde aan die kontrak nie, het hulle gemeen. Hierdie hele proses was ’n rolspel om te wys wat met die een sou gebeur wat die kontrak verbreek. Hy sou dieselfde lot hê as die diere wat geslag is. In Genesis 15 lees ons van ’n kontrak wat gesluit word. Tussen Abram en God. Die wonderlike van dié verbond is dat net een party — God — die risiko dra as die verbond nie nagekom word nie. Net God het deur die stukke vleis beweeg om die verbond te sluit. Dit was net nodig vir Abram om die offers daar neer te sit. Dié verbond was die voorloper van die nuwe verbond wat Jesus aan die kruis kom sluit het met elkeen wat in Hom glo. God het met Jesus se kruisiging en opstanding Homself op ’n baie persoonlike, diep vlak aan mense kom verbind. Ja, Hy wil ’n onbreekbare verbond met jou sluit. ’n Verbond waar God Homself as die verantwoordelike party aanstel. Hy neem al die risiko op Homself. Ons is, soos Abram, net daar om ’n offer te verskaf. Die offer is ons hart. Dis ons lewe. Sal ons dan nie onsself daaraan wy om heilig en dankbaar voor so ’n genadige, liefdevolle God te leef nie? Francine van Niekerk is redakteur van LiG-tydskrif.