Kleurvolle inspirasie vir grootmense [resensie]

Inkleurboek

KLEURVOLLE INSPIRASIE VIR GROOTMENSE

Kikker jou lewensreis op met kleur en Bybelse inspirasie

Illustrasies deur Amylee Weeks

CUM

2015

Inkleurboeke vir grootmense het die mark oorgeneem soos ‘n orkaan. Skielik is dit wat mense besig hou en help om spanning en stres te verlig. En Christene het die voordeel dat hulle dié kunsvorm kan gebruik om hulle verhouding met die Here te dien. Trouens, ek meen dat inkleurboeke die potensiaal het om ‘n nuwe spiritualiteit te skep, van stilword en nadenke, bepeinsing en luisterende gebed.

Hier is ‘n uitstekende voorbeeld daarvan. Pragtige illustrasies van Amylee Weeks rondom gebede (Vader, ek lê my bekommernisse by u voete neer. Lei my elke dag. Amen) en teksverse (Gelukkig is dié mense wat op die Here vertrou. Jeremia 17:7) bied volop geleentheid om tyd met die Woord deur te bring, wat die potensiaal het om tyd in die teenwoordigheid van die Woord, Jesus Christus, te bring.

Die boek is in ringbind-formaat, wat dit uiters gemaklik maak om te hanteer. Dit is ook net op een kant gedruk. Indien jy verkies, kan jy die ingekleurde prent verwyder en raam. Dit skeur maklik uit omdat dit geperforeerde bladsye het. En daar is ook die bonus van geskenk-etikette, kaartjies en boekmerke wat jy kan inkleur en uitsny, en met ander kan deel. Die trefwydte van die inkleurboek vergroot hierdeur sodat jy jou kreatiwiteit kan gebruik om ander te seën.

Dis ‘n ideale geskenkboek vir iemand vir wie jy baie omgee. En as daardie iemand jouself is, is dit ‘n uitstekende belegging. Want die inkleurboek skep baie ure se inkleurgenot.

#mariusnel #resensies