Laer inkomste, hoër lewenskwaliteit

deur Stephan Joubert Glo jy ook die mite dat jou lewenskwaliteit direk in verband staan met jou inkomste? Hoe hoër jou inkomste, hoe hoër is jou lewenskwaliteit? Wel, dis eenvoudig nie waar nie. Geld is nie onbelangrik nie, maar geld is definitief nie die regte meetinstrument wanneer die sin van jou lewe voor God op die tafel geplaas word nie. ’n Goed geleefde lewe in die Here se teenwoordigheid word gemeet aan jou sorgvryheid en geloofsmoed om Hom te vertrou vir jou daaglikse brood. Jou geld moet suurstof wees, nie koolsuurgas wat jou laat versmoor nie. Jy mag nie gedurig hieroor bekommer, of alles net op jouself uitmors nie. Leef altyd binne jou inkomste. Begroot heel eerste elke maand vir daardie deel wat jy vooruit in diens van God en tot seën van minderbevoorregtes gaan weggee, en hou daarby. Verras jouself deur gedurig op onbeplande maniere iets weg te gee. Leef vrygewig. Leef ruim in terme van die weggee van jou tyd, energie, sente en omgee. Wees ’n seën vir ander. Dan sal God op verrassende maniere die hemele bokant jou oopmaak. Dan sal jy om elke hoek en draai Sy guns en omgee ervaar.

#kernkrag #stephanjoubert