Laat jou lewe jou taal agterna praat
deur Stephan Joubert ’n Mikro–storie, wat hardnekkig aan die beroemde skrywer Ernest Hemmingway toegedig word, lui: “For sale: baby shoes, never worn!” Hierdie uitdrukking ondervang ’n volledige verhaal in net ses woorde. Van kortverhale gepraat, Jesus is die absolute meester van vinnige verhale en een–lyn waarhede. Dink maar net aan sy uitsprake soos: “Ek is die brood van die lewe.” “Soek heel eerste die koninkryk van God en sy geregtigheid, en die res sal vir julle gegee word.” “Jakkalse het gate en voëls het neste, maar die Seun van die mens het nie eens ’n rusplek vir sy kop nie.” “Die Seun van die mens het nie gekom om gedien te word nie, maar om te dien en sy lewe as ’n losprys vir baie weg te gee.” Ingewikkelde boeke en geleerde taal is nie aldag nodig om die waarheid hoorbaar of verstaanbaar te maak nie. Ook nie ellelange sinne of baie woorde nie. Soms is ’n paar woorde oorgenoeg. O ja, en ook ’n lewe wat getuig dat daardie einste woorde eg en deurdag is. Lewensveranderende taal vra om ’n veranderde lewe. Praat al jou prate kort en kragtig, maar laat jou lewe dit agterna getuig.
