Vanaf nêrens tot orals
deur Stephan Joubert Die profeet Habakuk het geleef in ‘n chaotiese tyd toe die magtige Babiloniese weermag alles voor hulle met die aarde gelyk gemaak het daar rondom die beginjare van die sesde eeu voor Christus. Uiteindelik het Jerusalem ook voor hulle mag geval. In hierdie tyd het die profeet Habakuk ook opgetree. Aanvanklik het hy gemeen God is nêrens te siene nie (hoofstuk 1). Habakuk se leuse kon net sowel gewees het: “God is nêrens.” “God is nowhere.” Toe doen hy die regte ding deur te begin wag op die Here (hoofstuk 2). Skielik het Habakuk agtergekom God is nie afwesig nie. Hy is nou hier. Toe verander sy leuse na: “God is now here.” In sy wagtyd het die profeet by God gehoor dat regverdiges deur die geloof sal lewe. Die hemele het toe bokant die eens omgesukkelde profeet oopgegaan. Habakuk het skielik die heerlikheid van God orals raakgesien terwyl lofliedere oor sy lippe uitgebreek het (hoofstuk 3). Hy het ontdek: “God is orals.” “God is everywhere.” Van nêrens tot orals, dit is regte die reis van geloof. Om God te sien, is om in geloof op Hom te wag en te doen wat Hy vra.