Kan God ook huil?
deur Stephan Joubert “A God who cannot suffer cannot love. A God who cannot love is a dead God.” So skryf die beroemde Duitse teoloog Jürgen Moltman. Die ou Griekse en Romeinse gode was onbeweeglike bewegers. Hulle het niks gevoel vir hulle menslike onderdane nie. Daarom dat hulle morsdood was... en steeds is! Die lewende God van die Bybel is soveel anders. Lyding is nie onbekend aan Hom nie. Toe sy eie Kind hier op aarde die Via Dolorosa in ons plek geloop het, het God pyn geken; sommer baie ook! Sy trane oor Jesus wat besig was om daar te sterf het die aarde donker gemaak. Toe het die son ophou skyn terwyl Jesus daardie Vrydagoggend aan die kruis gehang het. God se liefde maak dat Hy Homself gee. Genade kos Hom net mooi alles. Nee, die Here het nie ’n kaartjie uit die hemel gestuur wat sê Hy dink aan ons nie. Inteendeel, Jesus het tussen ons kom loop om God se hart vir ons te wys. Hy het in ons plek doodgegaan en ons pyn op sy eie skouers gelaai. God se liefde laat Hom ly. Daarom, omdat Hy medelye met ons pyn en lyding het, kan Hy ons elke keer uithelp.