Daar’s ’n verskil tussen ’n af-tyd en ’n af-lewe

deur Stephan Joubert

“My lewe is so vaal en voorspelbaar dat ek elke aand van verveeldheid aan die slaap raak.” Dit raak iemand onlangs kwyt na jare se diens in die kerk. Nou ja, ons elkeen het ons af-tye, maar dis iets anders as ons ’n af-lewe leef waar nie eens die evangelie van Christus ons meer opgewonde maak nie. Wanneer verveeldheid en voorspelbaarheid ons permanente adres geword het, dan moet ons dadelik verhuis. Ek weet nie maklik nie; veral nie as dit tweede natuur geraak het om in ’n vervelige groef te leef nie. Maar die verhuising begin as ons Jesus vars en nuut ontdek.

Ons kort ’n tweede bekering, een waar Jesus opnuut die Skat in die saailand van ons eie saai bestaan word. En waar ons Hom toelaat om ons daagliks op nuwe ontdekkingsreise deur die hemelse skatkamers rond te vat. Dan begin ons in dieselfde asem om Jesus se nabyheid rondom ons op te merk in elke persoon vir wie ons ’n bekertjie koue water aangee. Of in elkeen vir wie ons bid en met sy liefde op die hande dra. Dan breek die lig deur, Christus S’n! Dan verander ons nagmerries skielik in goeie drome waar die engele van God op en af klim teen die hemelse leer.

#kernkrag #stephanjoubert