Moenie jou asem mors nie

deur Stephan Joubert

Stan Gerlach moes ’n afskeidswoord by ’n vriend se begrafnis iewers in Kalifornië lewer. Aan die einde van sy kort toespraak het hy vir die aanwesiges gesê dat geen mens ooit seker is wanneer God jou die dag kom haal nie. Hy het toe bygevoeg: “At that moment, there’s nothing you can do about it. Are you ready?” Toe gaan sit Stan skielik. Net daar voor almal sak hy inmekaar en sterf. Skaars het Stan vir die begrafnisgangers gevra of hulle gereed is om die lewende God te ontmoet, toe sterf hy met hierdie einste woorde op sy eie lippe. So vertel Francis Chan, wat vroeër sy leraar was, in een van sy boeke.

Daar kom ’n dag dat ons elkeen ons laaste asemteug moet uitblaas. Dan eindig alles. Of nie! Wat dan? Het jy al hieroor nagedink? Of dink jy die lewe aan dié kant is ewigdurend? Leef jy so dat elke asemteug van jou goeie asem in jou longe is waarmee jy God verheerlik? Moenie enige asem mors nie. Laat jou asem tel. Maak Christus groot in alles wat jy dink, doen en sê. Dan haal jy goed asem. Dan sal jou laaste asemteug aan hierdie kant van die graf die beste een ooit wees.

#stephanjoubert #kernkrag